నైరుతి రుతుపవనాలు దక్షిణ బంగాళాఖాతం, అండమాన్ నికోబార్ దీవుల్లోకి ప్రవేశించేందుకు పరిస్థితులు అనుకూలంగా ఉన్నాయని అమరావతి వాతావరణ కేంద్రం వెల్లడించింది. ఇదిలావుండగా, దక్షిణ తమిళనాడు పరిసరాల్లో కొనసాగుతున్న ఉపరితల ఆవర్తనం సముద్ర మట్టానికి సగటున 1.5 కిలోమీటర్ల ఎత్తు వరకు విస్తరించి ఉందని, ఉత్తర-దక్షిణ ద్రోణి ఇప్పుడు దక్షిణ తమిళనాడు మీదుగా విదర్భ నుండి తెలంగాణ మీదుగా ఉపరితల ద్రోణి  రాయలసీమ సముద్ర మట్టానికి 0.9 కి.మీ. వరకు విస్తరించి ఉందని వాతావరణ శాఖ తెలిపింది. 

ఉపరితల ఆవర్తనం ప్రభావంతో ఆంధ్రప్రదేశ్‌లోని ఉత్తర కోస్తా, యానాం, దక్షిణ కోస్తా ప్రాంతాల్లో నేడు, రేపు తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ ప్రకటించింది. ఈ మేరకు ఓ ప్రకటన విడుదల చేసింది. అయితే, గరిష్ట ఉష్ణోగ్రతలో పెద్దగా మార్పులు ఉండకపోవచ్చని, ఒకటి లేదా రెండు చోట్ల గంటకు 40-50 కి.మీ వేగంతో గాలులు వీచే అవకాశం ఉందని అంచనా వేసింది. బుధవారం కొన్ని ప్రాంతాల్లో తేలికపాటి నుంచి ఓ మోస్తరు వర్షాలు కురిసే అవకాశం ఉందని, గంటకు 30-40 కిలోమీటర్ల వేగంతో ఈదురు గాలులు వీస్తాయని వాతావరణ శాఖ తెలిపింది.