న్యూఢిల్లీ: రింగ్‌రోడ్‌ కేసులో టీడీపీ ప్రధాన కార్యదర్శి నారా లోకేష్‌కు ఆంధ్రప్రదేశ్‌ సీఐడీ 41ఏ సీఆర్‌పీసీ నోటీసులు అందజేసింది. ఈ బృందం ఢిల్లీ వెళ్లి టీడీపీ నేత గల్లా జయదేవ్ నివాసంలో నోటీసును అందజేసింది.

క్రిమినల్ ప్రొసీజర్ కోడ్ సెక్షన్ 41ఏ కింద సీఐడీ అధికారులు నోటీసులు ఇచ్చారు. గత కొన్ని రోజులుగా టీడీపీ నేత న్యూఢిల్లీలో ఉంటున్నందున నోటీసులు అందజేయడానికి సీఐడీ బృందం దేశ రాజధానికి వెళ్లింది. అక్టోబర్ 4వ తేదీ ఉదయం 10 గంటలకు ఇక్కడి సీఐడీ కార్యాలయంలో విచారణకు హాజరు కావాలని లోకేశ్‌ను ఆదేశించారు.

ఈ కేసులో లోకేష్ ను 14వ నిందితుడిగా పేర్కొంటూ సీఐడీ సెప్టెంబర్ 26న విజయవాడ ఏసీబీ కోర్టులో మెమో దాఖలు చేసింది. ఈ కేసులో ముందస్తు బెయిల్ కోసం టీడీపీ ప్రధాన కార్యదర్శి ఆంధ్రప్రదేశ్ హైకోర్టును ఆశ్రయించారు. విచారణ సందర్భంగా క్రిమినల్ ప్రొసీజర్ కోడ్ సెక్షన్ 41ఏ కింద లోకేష్‌కు నోటీసులు జారీ చేస్తామని సీఐడీ కోర్టుకు తెలియజేసింది.